O Tsismis, Layuan Mo Ako

Mula noon pang araw ay uso na ang tsismis. Ito na ata ang isa sa pinakamatandang libangan ng mga tao.  Kahit si Kristo ay nakaranas matsismis. Ewan nga ba kung bakit enjoy na enjoy talaga ang mga madlang people kapag buhay na ng may buhay ang pinag-uusapan. Lahat na ng libangan pagsasawaan ng mga tao liban sa pagtsitsismisan. Patuloy na malalaos ang mga fashion, artista, mga kanta at sayaw kagaya ng Buttercup nung High School ako, Otso Otso nung college ako, at sa Gangnam Style ngayon nagtatrabaho na ako. Tuluyan na rin mababaon sa limot ang sex scandal ni Hayden Koh pagkatapos sumikat nila Kim Kardashian at Paris Hilton sanhi na rin ng pagkakaroon ng sex scandal. Sino ba ang makakalimot sa primetime coverage ng revelation ni Kris Aquino ng paghihiwalay nila ni Joey Marquez? Tila tumigil ang buong Pilipinas lalo na noong umamin siya na nagkaroon siya ng STD dahil sa dati niyang nobyo. Iyon ngang balita kina Hayden Koh biruin niyo ay dahil napunta sa lahat ng pahayagan sa Pilipinas pati mga boss ko na foreigner na hindi naman nanonood at nakakaintindi ng mga ganoon ay biglang nag usisa tungkol sa isyu!

Lahat tayo ay lilipas ngunit ang tsismisan ay patuloy na mamayagpag sa mundo. Habang may mga taong ginagawang pampalipas oras ang pag-usapan ang buhay ng iba ay hindi malalaos ang tsismisan. 

Bawat tao ay may sariling paraan ng pagintindi sa mga nagaganap--sa mga nakikita, naaamoy, naririnig, nararamdaman o nahahawakan, at nalalasahan. Ang isang simpleng nagaganap sa ating kasalukuyan ay maaaring bigyan ng maraming kahulugan ng bawat tao. Parang konsepto ng Vantage Point lang. Ganoon din ang tsismis. Kanya kanya tayo ng pagtanggap at pagintindi. Maraming nadadagdag at nababawas sa simpleng pangyayari. 

Parang ganito lang:

Excuse me ho, puwede po ba kayong ma-interbyu?
- tungkol saan ba yan?

Sa Tsismis. Alam niyo po ba yun?
- Ah, oo naman. Lahat ata alam yan. Tanong ba yan?

Ano po pangalan niyo?
- puwede bang secret kasi baka malaman ng mister ko.

Huwag po kayong mag-alala sigurado po 'di niya ito malalaman 'di naman ata siya marunong mag-internet.
- Facebook lang alam niya. Sige na nga. Fine, Inday na lang itawag mo sa akin.

Aling Inday, ano po trabaho niyo?
- housewife ako. 

Ano po ang paboritong libangan/hobby mo?
- Mag-tsismis tungkol sa buhay ng may buhay, manghula kung sinong artista ang sinasabi blind item. Alam ko yata istorya ng mga tao dito sa baranggay. Kapag nalulungkot ako lalabas lang ako at hahagap ng tsismis buhay na agad ang dugo ko. 

Ano ang mga paboritong TV show mo?
- Of course, The Buzz at HOT TV. Kainis nga 'di ko matiyempuhan ang show ni Ate Cristy. Nakakainis nga kasi tuwing linggo lang. Bitin! Yun Chikaminute nga nakakabitin panoorin. 

Ano ang paborito mong Radio show?
- show ni Ate Cristy Fermin (laging may blind item yun e, challenging hehe)

Ano ang paborito mong dyaryo?
- Bulgar, pati na rin yun ibang tabloid basta may blind item at tsismis tungkol sa mga artista at politiko. yun lang naman talaga binabasa ko e.

Saan ka lagi tumambay?
- Diyan sa may kapitbahay, sa barberya, sa beauty salon, sa tindahan sa kanto, basta kung saan may masasagap na tsismis

Sino ang mga kaibigan mo?
- source ng tsismis; mga kasambahay, mga tindera, mga bakla, mga tambay

Sinong mga paborito mong celebrity?
- Sina Boy Abunda, Cristy Fermin, Sweet Lapus. Gusto ko rin si Anabelle Rama kasi kontrobersyal e. 

Bakit ka nakikitsismis?
- Masaya e. Nakakalibang. Nakakadagdag ng kaalaman (true to life pa!) Daig ko pa si Charo Santos at Mel Changco kung buhay ng iba ang paguusapan. Kaya kong ikuwento ang buhay ng mga kapitbahay namin.

Ano ang latest scoop mo dito sa paligid?
- Noong isang gabi, nakita ko ang girlfriend ng anak ni Manny na iniwan ng asawa nagsusuka sa labas ng bahay nila. Siguro buntis na. Mga kabataan talaga. Tsk.

Ganun? Nagsusuka lang, buntis na? Paano mo nasabi?
- Narinig ko kasi sabi ng anak ni Manny mamanahin yata niya ang pagiging babaero ng Lolo niya. Tsaka umaangkas kaya sa motor yun babaeng yun. Di na nahiya! 

E paano po kung di naman lumaki ang tiyan?
- E di pinalaglag! Siguro kinukunsinte ng mga magulang ang yan kaya nagkaganyan. 

Sa inyo po ba, ano pong latest?
- wala naman bago. Ganoon pa rin naman. Maayos pa rin pagsasama namin ng mister ko. Maayos rin ang mga anak ko. 

E bakit po sabi nang kapitbahay niyo lagi raw sa beerhouse ang mister niyo?
- naku hindi totoo yan. Mga tsismoso at tsimosa mga yan. Mahal ako ng mister ko. Wala siyang babae!

Wala naman po akong sinabing may babae siya ah. Bakit mayroon po ba?
- wala nga. wala, wala, wala, wala! nakita lang dumaan sa may beer house parati nang nagpupunta doon? Doon kasi siya binababa ng jeep na sinasakyan niya. puwede ba, next question please.

E yun mga anak niyo po? Kamusta po sila?
- Sabi ko nga maayos ang mga anak ko. Mababait  ang mga anak ko. Walang bahid dungis ang mga iyon.

Ah talaga po? Sabi po kasi ni Aling Berta adik po raw mga anak niyo.
- Adik? Sinungaling ang matandang iyon! Huwag ka maniwala. Buti pa umalis ka na dito kasi marami pa akong gagawin.... 


Isa lang si Aling Inday sa marami. Biruin niyo nagsusuka lang, napag-isipan nang buntis. Mayroon bang naglilihi na nagsusuka sa gabi?? Hindi ba morning sickness tawag dun? Hindi naman evening sickness? Kapag hindi raw lumaki ang tiyan, nagpalaglag na. Nadamay na rin pati ang mga magulang nila ng hindi nila alam na pinag-iisipan na pala sila ng iba ng  kuwento. Isang pangyayari ang dami nang kadikit na kuwento. Bakit ang dali para sa atin na pag-usapan ang buhay ng iba ngunit kapag tungkol na sa buhay natin ay ayaw na natin pag-usapan? Ang dali para sa ating husgahan ang ibang tao bago natin tignan ang sarili nating buhay.

Sino ba ang mas mahilig sa tsismis? Babae ba o lalaki o bakla? Lahat? Wala naman ata sa kasarian masasabi ang pagkahilig sa tsismis. Hindi ka "in" kapag hindi mo alam ang latest chika. 

Ang tsismis ay parang tukso lang. Maliit na bagay ay parang motibo para gumawa ng kuwento ang madlang people na walang pinagkakaabalahan kung hindi pag-usapan ang buhay ng iba. Kasi naman kahit sa TV, radyo, dyaro pati na rin sa internet at mga magazine puro tsismis. Kung puwede lang talaga nating sabihin, O tsismis, layuan mo ako...

Ikaw, anong tsismis sa iyo?