Noong bata ako, isa sa mga panahon na inaabangan ko ay ang Pasko. Mahaba ang bakasyon habang malamig ang simoy ng hangin. Mayroon rin mga nagbibigay ng regalo at pera sa iyo. Ibang iba kaysa summer vacation. Bakasyon nga, pero mainit at matagal na walang natatanggap na allowance.
Marami rin kaming mga tradisyon sa pamilya kapag kapaskuhan. Kadalasan masaya ang lahat lalo na kapag Christmas Party at reunion.
Lumipas ang maraming taon ay malaki na ang pinagbago ng sitwasyon ko. Kung dati ay ako ang binibigyan ng regalo at pera, ako na ang inaabangan magbigay ng pera. Bukod dito ay kabi kabila rin ang mga kailangan gawin at puntahan kapag ganitong panahon. Noong buhay pa ang mga magulang ko, hindi kami napipirmi sa bahay kapag ganitong panahon. Nagsisimula ng ika-15 ng Disyembre ay nagsisimbang gabi kami hanggang bisperas ng Pasko. Pagdating ng Pasko ay magsisimba ulit bago mag reunion kasama ng kamag anak ng nanay ko.
Nakakatuwa rin kapag ganitong panahon noong bata ako. Ang sipag ng nanay ko mag decorate ng bahay namin. May Christmas Tree, may mga garland, Christmas lights. Pati ang kurtina namin, table runner, table cloth, pillow case, lahat ay para sa Pasko ang design. Habang ang casette tape ng album ni Jose Mari Chan na "Christmas in our Hearts" ang paulit ulit na pinapatugtog sa bahay. Kapag natapos na ang isang side ay babaliktarin upang yun kabilang side naman ang tumugtog. Kaya nakakabisado namin ang lyrics ng mga kanta doon sa album.
Dahil bakasyon ay dinadala kami sa mall. Binibili kami ng bagong damit na isusuot sa Pasko. Nanonood rin kami ng palabas sa COD Department Store sa Cubao.
Pero sa ngayon ay nakakainis na ang panahon na ito para sa akin. Nakakainis pumunta sa mall kasi naparaming tao at napaka trapik. Ang taas ng anxiety ko kapag maraming tao sa paligid. Ayokong nakikipagpalitan ng mukha sa mga tao sa labas. Hangga't maari sana ay ayokong lumalabas na.
Hindi na rin gaano kaganda ang panahon ngayon. Hindi katulad dati na kapag ganitong panahon na ay hindi na umuulan. Malamig lang ang simoy ng hangin. Masarap maglakad lakad sa paligid. Pero hanggang ngayon ba naman umuulan pa rin araw araw???? Kailan ba matatapos ang ganitong panahon ng tag-ulan?????
Napakagastos rin kapag ganitong panahon. Kailangan bumili ng mga regalo lalo na sa mga Christmas Party at reunion na pupuntahan. Marami rin mga Christmas Party at reunion na pupuntahan. Minsan hindi mo na alam ano uunahin. Yun iba ay nagsasabay sabay pa. May kunwari sale pa, hindi pa rin naman mura ang bilihin. Ang mamahal na ng mga bilihin ngayon. Hindi na sapat ang 1000 pesos para makapaghanda ng maayos para sa Pasko ay Bagong Taon. Kapag reunion, ikaw na rin ang inaasahan magbibigay ng pera at regalo. Kanya kanya rin ang mga taong tingin sa mga cellphone nila kapag reunion. Wala na sa party ang buong atensyon nila, hindi na kagaya ng dati na lahat nada program nakakatutok. Kailangan sumali sa mga laro kasi ano ba gagawin mo doon? Kapag may games, yun mga may trabaho rin ang hinihingan ng pa premyo.
Hindi na rin nakakatuwa ang mga sinasabi ng mga kamag-anak mo sa iyo kapag reunion. Dati ping-uusapan lang ang pag-aaral mo, o kung anong grade ka na ba, hanggang sa naging kung ano ang kukunin mong kurso sa kolehiyo, hanggang sa kung matatapos ka na. Pati na rin ang mo komento nila sa damit mo. Pero simula noong nakapag trabaho ka na, nakakainis na ang mga tanong at sinasabi nila. "Bakit ang taba mo ngayon?" o "May boypren ka na ba ngayon?". Mas lalo na noong nagsimula na silang magtanong nang, "kailan ka na mag-aasawa" o ano naman kaya ay, "bakit wala ka pa rin asawa?" Sa dami nilang nakakainis na comment na nakakababa ng self-esteem ay mas gugustuhin mo nang hindi na sila makita.
Mayroon rin mga batang sasabihin mag carolling daw sila pero hindi naman inaayos at tinatapos ang mga kanta. Ang matindi pa doon ay inaasahan nila na kapag magbibigay sa kanila ay isa isa silang bibigyan ng pera! Samantalang dati ang mga nag carolling ay maayos ang pagkanta at masaya na sa kahit magkano ang ibigay ng mga kapitbahay. Naabutan ko pa noong 25 centavos hanggang piso lang ang binibigay. Paghahatian pa iyon ng grupo.
Ikaw, mayroon ka na bang mga kinakainisan kapag dumarating na ang panahon ng Kapaskuhan ngayon?
Mga Komento
Mag-post ng isang Komento